Cerpenista - Ayo Ngarang Gotong Royong!

Antah ha nan ka disabuik, rang rumah mangarengkang seh. "Bareh abih, da...!" keceknyo pagih ko. Awak sadang paniang, nomor togel ndak mancogok-cogok doh. "Dima ka dapek pitih koh? Halah, sansai badan ko mah...!".

"378 nomor jitu dari Gunuang Ledang, Ntah bak ah kolah. Ka kadai Mangkutak Ciek lu", nyo bagumam dalam ati, sambie mahayun langkah adok ka kadai Tukang Togel tuh.

Di lapau Mangkutak lah eboh urang jo nomor nan kalua. Ado nan ba sorak sorak bantuak urang gilo. Ado pulo urang nan galak galak sanang. Lah gilo dunia ko!

Dek barasian kanai tipu mako dipasang 378 tuh... Ah tapi malang bana nasib Rajo Angek nan kalua 888. "Tagak dek Olimpiade Beijing komah", rutoknyo. "Kalera!!!".

"bisuak ndak buliah den kalah lai doh!" rutuaknyo dalam ati. "Den harus tanyo ka Ki Joko Pinter, amuah lo tiok ba ampok den kalah taruih se??" lanjuiknyo dalam ati.

"Ki Joko Pinter, rang awak paja tu mah. Cuma dek lamo manuntuik di Jogja, nyo tuka namonyo. Kalo ndak salah nyo baraja Komputer sinan. Lah jadi dukun Cyber nyo kini", mato Rajo Angek nano madok ka awan. Mahiruik, 234 nan baru nyo utang di kadai tuh.

Tibo tibo ado nan manapuak pundak Rajo Angek. Spontan Rajo Angek masang kudo kudo sambia ma liek ka balakang. "Hiaaaaaaaaattt!!" . Eh kironyo Ki Joko Pinter mah. "Kamu butuh bantuan? Weton mu apa?" tanyo Ki Joko Pinter ka Rajo Angek.

"Apo Weton tuh? Lah, lupo baso awak, yo?".

"Aku lali da" jawab Ki Joko Pinter. "Manga ang lali? di kaja setan yo" tanyo Rajo Angek nan kebetulan teloh.

"Ndak lari doh Nyiak, lali tuh lupo baso awak nyo".

"Ha, tu kan lai tu, takana baso awak?", kalera kato hati rajo Angek.

"Senek-senek lai takana Nyiak!", tambah Ki Joko Pinter. Nyo mangko ma, Weton tuh etongan hari lahia mah. Ha, ari apo Inyiek lahie, tanggal bara? pukua bara?

"Ndehhh lai tau dek ang tu Nter, itu siriak mah, siriak!! Lai jaleh dek waang??" kecek Nyiak Aji nan kebetulan lewat lapau Tukang Togel. "Badoso, badoso... karak narako!

"Tapi ba a dek Buya tuh, dari pado basitegang jo Induak Bareh?", bela Rajo Angek. "Tobat... tobat... tobat!!!', Nyiek Haji bakirok dari sinan, malangkah adok ka surau.

"Ari Salasa, tanggal 3 bulan 7 tahun 68, co etong tek! Apo angko baiak pakan muko?, tanyo Rajo Angek berharap.

"Hmm.. Weton uda Kuciang Aia mah.. kalo ambo terawang terawang bantuaknyo angko nan rancak 182 atau indak angko 666. Pasti kalua tuh. Ambo jamin" Kecek Ki Joko Pinter nan banamo asli Malin Bujang Gata.

"Nan, sabana nyo lah ko?", lah tabayang dek Rajo Angek ka manggadai sa lupak sawah Pusako.

"Oy, Mangkutak. Untuak pakan muko alah bisa dibali kini dak", ariaknyo adok ka Rang Kadai.

"Alah! nomor bara nan ka Sutan pasang?? Lakeh lah. Beko di Ambiaknyo dek urang marugi Sutan", jawab Mangkutak sambia ma angek angek-i.

Oi..manganai umpan Mangkutak..," Aden pasang batandan angkonyo Kutak, nak rapek jalo tu stek..", kato Rajo Angek batagak pinggang.

"Kok ado nan lai ka mamagang sawah tu 6 ameh, den pasangkan sado alah e, Tabungkuak Induak Samang si Kutak mambayieh pakan muko andak nyo", khayal Rajo Angek.

Sudah tu nyo galak-galak surang. Sambie mahambuih asok rokok. "Hoi... apo nan bagalak an tuh Sutan?", tanyo Ranguang, tangkulak padi.

"Ops, kebetulan komah, pucuak dicinto ulam tibo. Angku Ranguang... Iyo... iyo, ha ba a kaba? Kama seh lah lamo ndak main ka mari?, sorak Rajo Angek kagirangan.

"handeh.. denai sibuk bana kini sutan ha. banyak busines kato urang bilando" jawek Ranguang.

"Den ka minta tolong. 6 ameh seh. Sawah den lai ka jaminan nyo. Iko dapek nomor padek sbantako. Ki Joko Pinter, pakar komputer. Rang awak baraja ka Jawa kini pulang kampuang. Bilo juo wak ka manerai kapinterannyo", Rajo Angek basumangek.

"Si Malin anak tek Roih tuh? handeh tambah pandai se paja tu eh. Bisuak anak den, den kirim lo ka jawa cek lu. Bia bisa sarupo si malin" Kecek Ranguang.

"Ah rancak tu. Tapi jan lupo nan 6 ameh", gisienyo. "Deal". Ndak lamo sasudah itu bapasang nomor tadi. Nomor top dari si Malin. "Iyo santiangnyo aka rangik mak oii..." sambie basiua siua ketek nyo tingga an kadai Kutak. Tabayang manang pakan katibo.

"3768,768,68 lah saguluang gadang kupon Togel tuh mambubuang disaku muko sarawa Rajo Angek,iyo ndak nakah kalo dicaliak rang batino....

Sambia malagak Rajo angek pun pulang ka rumah jo hati sanang. Tibo di rumah di tanyo nyo dek bini rajo angek, Siti Jamidun "Kama se uda koh?? Lah tagak matoari ndak juo dapek pitih pambali bareh, jo apo wak ka makan bisuak da??".

" Kudok se tombol tombol kibor ", kato rajo angek spontan. Kironyo rajo angek acok mangudok kibor di warnet warnet dakek rumahnya.

"Eehh kibor kibor apo ko da? ndehh patuik lah abih se pitih tu. Ka warnet se karajo uda, maliek porno porno lo uda yoh?" tanyo siti jamidun.

Sadang sero basiarak jo bininyo, datang pulo adiaknyo Puti Reno berang-berang. "Nan ka lamak dek uda seh, manggadai tak baiyo. Nden kadukan ka KPK, Awaass!!! Rajo Angek pucek, takana dek inyo kalau KPK iyo lah maurus pakaro gadai manggadai ko. "Mak!".

"Ondeh mati lah den, sarupo lo den beko jo si Ali Min, Anggota Dewan Perwakilan Rakus" rutuak nyo dalam ati.

Sapakan sasudah itu, nomor togel nan ditunggu indak kalua. "Kalera..., Joko Pinter mato sagadang bola senter, takicuah den malah kironyo". Tabayang dek inyo sawah tagadai 6 ameh, sarato ancaman adiaknyo Puti Reno. Alun pulo muncuang bini nan rarau.

Di cari carinyo si Joko Pinter. Kironyo ari kamih patang lah baliak ka jawa. Nio di Kaja ka jawa pitih nan di saku ndak ado lai. Tabayang KPK nan ka ma usut kasusnyo.

Tibo di lapau si Mangkutak, nyo calieak urang lah heboh dek basorak. Banyak kironyo urang nan manang. Rasaki Rajo Angek bana nan sadang pai raun. Nyo pilih tampek di suduik kadai. Disitu badan nyo duduak an. "Kopi steng, Kutak! Utang dulu".

"Utang ka utang se ang mah! utang ang pakan patang alun ang bayia lai. Ma lo bisa utang taruih, rugi lah den." tulak Mangkutak.

Wiu wiu wiu..., dari jauah tadanga bunyi serine. Antah ambulance antah kebakaran. Urang dalam kadai kalua bahamburan. Kironyo oto polisi, sarato jo oto patugeh KPK. Rajo Angek manggigie, ndak taraso sarawanyo lah gaca. Nyo ma andok ka baliek dapua.

kabanyo penyergapan kali iko pakai helikopter bagai. lah samakin panik rajo angek.

Rajo Angek bantuak ayam tangga taji, bantuak rimau tangga gigi. Nyo bagaluang seh dalam dapua.

Sabanta seh lapau Mangkutak dikapuang dek Polisi dan Patugeh dari KPK. "Kami dapek kaba kalo Angku Rajo Angek acok kongkow di lapau ko?", tanyo Kapalo Polisi nan bapangkaik Kapten ka Mangkutak. Guyah dak bakakantuan seh rasonyo ditanyo dek polisi tu.

"Ba ba.. Batua pak. Ado apo jo Rajo angek pak? Ambo ndak sato doh pak" jawab Mangkutak katakuikan. Lutuiknyo bagoyang goyang bantuak ka tangga.

Ruponyo jadi juo, adieak Rajo Angek Malapor. Makonyo dicari dek patugeh. Tapi, Rajo Angek ndak ilang aka, "Tolong calieak, ma surek penahanan nyo?!" Takana dek inyo apo pulo hubungan gadai manggadai jo KPK. "Iko kan masalah adaik? Bukan korupsi?

"Berdasarkan laporan sdri Puti Reno,atas tuduhan penyalah gunaan kewenangan terhadap harta pusaka keluarga,menindak lanjuti laporan tsb dengan batas waktu yg blm ditentukan sdr.Rajo Angek ditahan untuk penyelidikan"bunyi sahalai surek dari patugeh.

"O... ndak bisa! Ambo paralu Pengacara, pengacara... ", ceknyo maliang ayam aden ko kato ati Rajo Angek.

***

Di Pengadilan Tipikor. Rajo Angek nampak lesu. Takana sasa dek inyo.

"Manolah Sutan Palimo nan bagala Rajo Angek!", imbau Hakim Ketua. "Ambo tuan Hakim", jawek Rajo Angek pendek seh.

"Jadi apo alasan sudaro manggadaian sawah pusako?" Tanyo pak hakim. Rajo angek tadiam ndak tantu apo nan ka di jawab. Bantuak talua di ujuang tanduak ndak bisa manga manga lai. Kalua paluah dinginnyo.

"Ha...baa tu anok se tuan?? jawek lah tanyo ambo..dek baa tuan manggadaian sawah pusako", tabik lo suga pak hakim.

"Dek, lah bosan marasai, Angku. Mangko dicubo, mamasang nomor agak banyak. Kok manang, kan ado modal untuak manjadi Caleg bagai tuh. Kok lai ka barubah nasib ko..." tatap manunduak.

"ha...baa manuruik panuntuik koh????" kato hakim. Tabik lo cangguang hakim dek nyo. "Ndak bisa di maafkan doh yang mulia hakim, masalahnyo iko tanah pusako, keceknyo apak tiri nyo yang mambali", emosi panuntuik di buek nyo.